စင်ကာပူနည်း စင်ကာပူဟန်နဲ့ မြန်မာ့နည်း မြန်မာ့ဟန်

စင်ကာပူနည်း စင်ကာပူဟန်နဲ့ မြန်မာ့နည်း မြန်မာ့ဟန်
===================================

သြဂုတ်လ ၉ ရက်ဟာ စင်ကာပူတည်ထောင်ခြင်း နှစ် ၅၀ ပြည့်၊ ရုံးပိတ်ရက် ၄ ရက်သတ်မှတ်ပြီး ပျော်ပွဲ ရွှင်ပွဲတွေ ကျင်းပတယ်။
စင်ကာပူတည်ထောင်ခဲ့တဲ့ ဖခင်ကြီး လီကွမ်ယုကို အမှတ်တရပွဲတွေ လုပ်ကြတယ်။ လီကွမ်ယုဟာ နှစ် ၅၀ အတွင်း စင်ကာပူနိုင်ငံကို နုံချာလှတဲ့ တံငါရွာဘဝမှ ကမ္ဘာ့ အချမ်းသာဆုံးနိုင်ငံ စာရင်းဝင်အောင် အသွင်ပြောင်းပေးနိုင်ခဲ့တယ်။
နှစ် ၅၀ ပြည့်မြောက်ချိန်မှာတော့ မိုးထိတိုက်တာကြီးများ၊ သေသပ်လှပတဲ့ ဥယျာဉ်ကြီးများ၊ သန့်ရှင်းသပ်ယပ်တဲ့ အိုးအိမ်များ၊ ယာဉ်ပိတ်ဆို့မှုမရှိတဲ့ လမ်းများ၊ နိုင်ငံပေါင်းစုံက လူငယ်များ တက်ရောက်ချင်ကြတဲ့ တက္ကသိုလ်ကြီးများ၊ တိုးရစ်များနဲ့ ပြည့်နေတဲ့ shopping centre ကြီးများ၊ ကမ္ဘာ့ သင်္ဘောအဝင်အထွက်အများဆုံး ဆိပ်ကမ်းများ နဲ့ ဒေသတွင်း အကြွယ်ဝဆုံး၊ မနာလိုဖြစ်စရာအကောင်းဆုံးနေရာ ဖြစ်နေတော့တယ်။
လီကွမ်ယု စတက်လာချိန် လူတော်တွေ နေရာပေးပြီး
စင်ကာပူနည်း စင်ကာပူဟန် ကျင့်သုံးတဲ့အချိန်
မြန်မာနိုင်ငံမှာတော့ စစ်အာဏာရှင်တွေဟာလူတော်တွေ နှိပ်ကွပ်ပြီး
မြန်မာ့နည်း မြန်မာ့ဟန် ဆိုရှယ်လစ်စနစ်ကို စတင်ကျင့်သုံးတော့တယ်။
ဒီလိုနဲ့ နှစ်ပေါင်း ၅၀ ကျော် ကြာလာတဲ့အခါမှာတော့ ...
စင်ကာပူဟာ အဂတိလိုက်စားမှု အကင်းဆုံး top 10 စာရင်းဝင်အဖြစ် ရပ်တည်နေတဲ့ အချိန်မှာ မြန်မာနိုင်ငံကတော့ အဆင့် ၁၇၂ နဲ့ ငွေ မပေးရင် ဘာမှ အလုပ်မဖြစ်တဲ့ နိုင်ငံ ဖြစ်နေပါတယ်။
စင်ကာပူနိုင်ငံတွင်း မူးယစ်ဆေးရောင်းဝယ်မှုတွေ အားလုံး သေဒဏ်ပေးပြီး ကင်းစင်အောင် လုပ်နိုင်တဲ့ အချိန်
မြန်မာနိုင်ငံမှာတော့ ကမ္ဘာ့ ဒုတိယ အကြီးဆုံး မူးယစ်ဆေးဝါးဖမ်းဆီးမှုကြီးဖြစ်ပွားခဲ့ပြီး ပိုင်ရှင်မဲ့ ဖြစ်သွားခဲ့ပါတယ်...။
စင်ကာပူမှာ ဒေါ်လာ ၂ သောင်းလောက်နဲ့ ကြိုက်တဲ့ နိုင်ငံက လွယ်လွယ် ကုမ္ပဏီလာထောင်နိုင်တဲ့အချိန်
မြန်မာနိုင်ငံမှာတော့ ကိုယ့်နဲ့ ပုလင်းတူဗူးဆို့ ခရိုနီတွေ ကာကွယ်ပေးတဲ့အနေနဲ့ နိုင်ငံခြား ရင်းနှီးမြှုပ်နှံမှုတွေ ကန့်သတ် ချုပ်ချယ်နေပါတယ်။ နိုင်ငံတကာ ကုမ္ပဏီတွေဆိုတာလဲ ကိုယ့် ဂုဏ်သိက္ခာနဲ့ကိုယ် undertable မပေးတတ်ကြတော့ ဝင်လာဖို့ ခက်ခဲခဲ့တယ်။
စင်ကာပူ ရဲများ နိုင်ငံဝန်ထမ်းများဟာ အနောက်နိုင်ငံများရှိ နိုင်ငံ့ဝန်ထမ်းများထက်လစာထက် ပိုရရှိနေတဲ့အချိန်
မြန်မာနိုင်ငံတွင်တော့ အနိမ့်ဆုံး လုပ်ခ တစ်ရက် ၃၆၀၀ သတ်မှတ်ဖို့ သောင်တင် ရေမကျ ဖြစ်နေတယ်။
စင်ကာပူဟာ ဒေသတွင်း မှာ ဖွားသေနှုန်းနိမ့်လွန်းလို့ လက်မထောင်နိုင်နေတဲ့အချိန်
မြန်မာနိုင်ငံမှာတော့ ဒေသတွင်း ဖွားသေနှုန်း အမြင့်ဆုံးဖြစ်နေတယ်။
စင်ကာပူမှာ ညဘက် မည်သည့်အချိန် မည်သည့်နေရာမဆို အမျိုးသမီးတစ်ယောက်ထဲ လျှောက်သွားနိုင်တဲ့အချိန်
မြန်မာမှာတော့ နေ့ခင်းကြောင်တောင်ကြီးတောင် လူယက်မှု၊ အုပ်စုဖွဲ့ လူသတ်မှု၊ ကုန်းသီး ပစ်မှုကြီးများ ပေါ်ပေါက်နေတယ်။ ကချင်ဆရာမ ၂ ယောက်ဆို ကိုယ့်အိမ်တွင်းမှာ အိပ်နေရင်းတောင် မုဒိမ်းကျင့် အသတ်ခံခဲ့ရတယ်။
စင်ကာပူနိုင်ငံမှာ မိုးမျှော်တိုက်တွေ၊ apartment တွေ၊ ကားပတ်ခ်တွေ ဟာ ကျယ်ကျယ်ဝန်းဝန်း အစီအရီ လှပနေပေမယ့်
မြန်မာ့နိုင်ငံမှာတော့ ပုံပန်းမကျ စုပြုံနေတဲ့ လေဝင်လေထွက်မကောင်းတဲ့ အဝတ်တွေ မြင်မကောင်းအောင်လှမ်းထားတဲ့ ကွန်ကရိ တိုက်တောတန်းဟာ အော်ဂလီဆန် စရာပါပဲ။ ကားပတ်ကင်အတွက်လည်း နေ့စဉ် ရန်ဖြစ် ရုံးရောက် ဂါတ်ရောက်ပါပဲ။
စင်ကာပူမှာ သပ်ရပ်လှတဲ့မြို့တော်တွင်း မှုတ်ဆေး graffiti ဆွဲတဲ့ ကမ္ဘာ့နံပါတ် ၁ အမေရိကန် နိုင်ငံမှ လူငယ်ကို ကန့်ကွက်မှုတွေဂရုမစိုက်ဘဲ ကြိမ်ဒဏ်စီရင်တဲ့အချိန်
မြန်မာမှာတော့ ရှားပါးလှတဲ့ သယံဇာတ သစ်တွေ ခိုးထုတ်တဲ့ ကမ္ဘာ့နံပါတ် ၂ တရုတ်က သစ်ခိုးသမား ၁၅၅ ယောက်ကို တသက်တကျွန်းချပြီးမှ ၈ ရက်နဲ့ ပြန်လွှတ်ပေးလိုက်ရပါတယ်။
စင်ကာပူ မြို့တွင်းမှာ အိုးမဲ့အိမ်မဲ့၊ သူတောင်းစား၊ အမှိုက်များ ကင်းစင်နေပြီး
မြန်မာနိုင်ငံမှာတော့ အိုးမဲ့အိမ်မဲ့ ကျူးကျော်များ၊ သူတောင်းစား၊ အမှိုက်များ ဒလကြမ်းဖြစ်နေရတယ်။
နှစ် ၅၀ အတွင်း လီကွမ်ယုက မျက်လှည့်ပြသလို စင်ကာပူကို ဖန်ဆင်းပြခဲ့သလို မြန်မာ့ စစ်အာဏာရှင်တွေကလည်း နှစ် ၅၀ အတွင်း မြန်မာနိုင်ငံကို မျက်လှည့်ပြခဲ့တယ်။ ဒါပေမယ့် ရလာဒ်ကတော့ ဆန့်ကျင်ဘက်ပါ။
အာရှအချမ်းသာဆုံး စာရင်းဝင်တဲ့ မြန်မာနိုင်ငံကို ကမ္ဘာ့ အဆင်းရဲဆုံး ဖွံ့ဖြိုးမှုအနဲဆုံး (LCD) နိုင်ငံဖြစ်အောင် ဖန်တီးပြခဲ့တယ်။ အာရှမှာဆိုရင် မိမိနောက်မှာ စစ်ဖြစ်နေတဲ့ အာဖဂန်နဲ့ ကုန်းတွင်းပိတ် နီပေါနိုင်ငံတို့သာ ရှိတော့ပါတယ်။ လာအို၊ ကမ္ဘောဒီးယား၊ အာဖရိကက အီသိုယိုပီးယားက အစ ကျော်တက်လို့ သွားပါပြီ..။
ဒီနေရာမှာ လီကွမ်ယုဟာ စင်ကာပူနည်း စင်ကာပူဟန် ကြွေးကျော်ခဲ့သလို စစ်အာဏာရှင် ဦးနေဝင်းက မြန်မာ့နည်း မြန်မာ့ဟန် ဆိုရှယ်လစ် ဆိုပြီး ကြွေးကျော်ခဲ့တယ်။ ၈၈ နောက်ပိုင်း စစ်အာဏာရှင်တွေကတော့ မြန်မာ့နည်း မြန်မာ့ဟန် ဒီမိုကရေစီဆိုပြီး ကြွေးကျော်ပြန်တယ်။
ဒါပေမယ့် လီကွမ်ယုကတော့ အလုပ်ဖြစ်ခဲ့ပြီး စစ်အာဏာရှင်တွေကတော့ အလုပ်မဖြစ်ခဲ့ချေ...။
အဓိကကတော့ ဥာဏ်ပညာနဲ့ ကိုယ်ကျိုးကြည့်မှု ကွာခဲ့ခြင်းသာဖြစ်တယ်။ လီကွမ်ယုဟာ ဥာဏ်ပညာကြီးသလို ကိုယ်ကျိုးစွန့် အနစ်နာခံမှုမှာလည်း ထိပ်တန်းဖြစ်ခဲ့တယ်။
စင်ကာပူ စတိုင်သုံးတယ်ဆိုပေမယ့် ဒီမိုကရေစီကို ၁၀ ရာနှုံးလောက်ပဲ ပြုပြင်ပြောင်းလဲခြင်းသာဖြစ်ပြီး မြန်မာမှာတော့ ကိုယ်ကျိုးစီးပွားကြည့်လွန်းကြပြီး ဒီမိုကရေစီကို ၅၀ ရာနှုံးကျော် ပြောင်းလဲဖို့လဲ ဝန်မလေးကြသူများဖြစ်ကြတယ်။
ဒါကြောင့် မြန်မာနိုင်ငံမှာတော့ ဒီမိုကရေစီဆိုတာ ယုံတမ်းစကားလိုဖြစ်နေခဲ့တယ်။
မြန်မာ့နည်း မြန်မာ့ဟန်လို့ ကြားလိုက်တာနဲ့ ပြည်သူတွေက ထမင်းလုံး တစ္ဆေ ခြောက်သလို အထိတ်တလန့် ဖြစ်ကြရပြီး အော့နှလုံးနာ ရွံ့ရှာခဲ့ကြရတော့တယ်....။
အော် ... မြန်မာ့နည်း မြန်မာ့ဟန်.... မြန်မာတစ်နိုင်ငံလုံးကို ဂျောက်ထဲ ဆွဲချသွားတဲ့ မြန်မာ့နည်း မြန်မာ့ဟန်.... လေပါတယ် မြန်မာ့နည်း မြန်မာ့ဟန်...။

Credit to : Shwe Moe Hein