အချုပ်အခြာအာဏာ တည်တံ့ခိုင်မြဲရေးနှင့် သဘာဝသယံဇာတ

စစ်တပ်က ၁၉၈၈ စက်တင်ဘာ ၁၈ ရက် နေ့ အာဏာသိမ်းသောအခါ “ဒို့တာဝန်အရေး ၃ ပါး” ကို တိုင်းပြည်သို့ စတင်မိတ်ဆက်ပေးခဲ့သည်။ ၎င်းတို့ကား မည်သူမျှမငြင်းနိုင်သော အမှန်တရားဖြစ်သည့် ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်မှု မပြိုကွဲရေးနှင့် အချုပ်အခြာအာဏာ တည်တံ့ခိုင်မြဲရေး တို့ဖြစ်ကြသည်။ သေချာစွာ တွေးတောစိစစ်ပါက အချက် ၃ ချက်စလုံးမှာ သဘောတရား အတူတူပင်ဖြစ်သည်။ တိုင်းရင်းသားအရေးကို ဦးစားပေးသယောင်ဖြင့် ပြည်ထောင်စုဟူသော စကားရပ်နှင့် တိုင်းရင်းသား စည်းလုံးညီညွတ်မှုဟူသော စကားရပ်ကို တစ်ခုစီ ထပ်မံထည့်သွင်းထားသော်လည်း အရေး ၃ ပါးစလုံး၏ အနက်မှာ တစ်ခုတည်းပင်ဖြစ်၏။ အချုပ်အခြာအာဏာ တည်တံ့ခိုင်မြဲရေးပင် ဖြစ်သည်။

မည်သူအတွက်ဟု တိတိကျကျ ဖော်ပြမထားသော အရေး ၃ ပါးမှာ တပ်မတော်သာမက နိုင်ငံသားအားလုံး လေးစားလိုက်နာရမည့် နိုင်ငံရေးရတနာ ၃ ပါးဖြစ်သည်။ သို့သော် တပ်မတော်အတွက်မူကား အနည်းငယ်ပိုသည် ဟုဆိုရမည်။ အဘယ်ကြောင့်ဆိုသော် ဒို့တာ ၀န်အရေး ၃ ပါးကို ကာကွယ်စောင့်ရှောက်ရမည်ဟု စစ်ခေါင်းဆောင်အသီးသီး၏ စစ်တက္ကသိုလ် ကျောင်းဆင်းမိန့်ခွန်းများနှင့် တပ်မတော်စစ်ရေးပြ အခမ်းအနားများတွင် ရဲမက်စစ်သည် အပေါင်းကို ရည်ညွှန်းပြောဆိုလေ့ရှိသောကြောင့်ပင် ဖြစ်သည်။ ပြန်လည် တွေးတောမည်ဆိုပါက မလိုက်နာနိုင်သူတို့ကို လိုက်နာအောင်ဆောင်ရွက်ပေးရမည့် တာဝန်မှာ တပ်မတော်သား အားလုံးတွင်ရှိသည်ဟူသော အဓိပ်္ပာယ်ဆောင်သည်။ သေနတ်ကြီးများ တကားကားနှင့် အခမ်းအနားများတွင် အမြဲတမ်းသတိပေးသလို ထည့်သွင်း ပြောကြားလေ့ရှိသောကြောင့် မလိုက်နာသူများကို အင်အားသုံး အရေးယူရမည့်တာဝန်မှာ တပ်မတော်၏ မူလတာဝန်ဖြစ် သည်ဟု စွဲမြဲစေရန် တမင်ရည်ရွယ်၍ ပြောဆိုခဲ့ကြသလားဟုပင် စဉ်းစားမိသည်။
၁၉၈၈ ခုနှစ်၊ စက်တင်ဘာလ ၁၈ ရက်နေ့တွင် တပ်မတော်မှ အာဏာသိမ်းခဲ့သည်ဟုဆိုကာ တပ်မတော် ထိပ်တန်းခေါင်းဆောင်များသာ ပါဝင်သည့် နိုင်ငံတော် ငြိမ်ဝပ်ပိပြားရေး တည်ဆောက်ရေးအဖွဲ့ကို ဖွဲ့စည်း၍ မြန်မာနိုင်ငံကို အုပ်ချုပ်ခဲ့သည်။ အစောပိုင်းကာလများတွင် အုပ်ချုပ်ရေး ပျက်ပြားနေသည်ကို အကြောင်းပြကာ အရပ်ဘက်တရားဥပဒေများ (ထိုအချိန်ကတော့ မြန်မာ့ဆိုရှယ်လစ် လမ်းစဉ်ကို အခြေပြုသောဥပဒေ)ကိုပြစ်ပယ်ပြီး စစ်အုပ်ချုပ်ရေးဖြင့် အုပ်ချုပ်ခဲ့သဖြင့် ပြည်နယ်တိုင်း ဒေသအသီးသီး၏ စစ်တိုင်းမှူးများသည် အမြင့်ဆုံး အာဏာများကို သုံးစွဲနိုင်သည်အထိ လုပ်ပိုင်ခွင့်များပေးခဲ့သည်ကို တွေ့ရသည်။ စစ်အုပ်ချုပ်ရေးသည် တိုင်းပြည်ကို အမှန်တကယ် တည်ငြိမ်အေးချမ်းအောင် ဆောင်ရွက်နိုင်ခဲ့ပါသလောဟု ဆန်းစစ်မည်ဆိုပါက နိုင်ငံရေးတက် ကြွသူများကို လုံခြုံရေးအကြောင်းပြ ဖမ်းဆီးခြင်း၊ စစ်အုပ်ချုပ်ရေးကို ဆန့်ကျင်သူများအား နှိပ်စက်ညှဉ်းပန်းခြင်း၊ လက်နက်ကိုင်တိုက်ပွဲများကို ပြင်းပြင်းထန်ထန် နှိမ်နှင်းခြင်းတို့ကို အတားအဆီးမဲ့ ဆောင်ရွက်နိုင်ခဲ့ခြင်းကြောင့် ငြိမ်ဝပ်ပိပြားသွားရုံသာ ရှိသည်။ ပြည်သူလူထုလို လားချက်များကို ဖော်ဆောင်နိုင်သောကြောင့် အမှန်တကယ် တည်ငြိမ်အေးချမ်းသွားခြင်းမျိုး မဟုတ်တာ အလွန်သေချာသည်။
စစ်အုပ်ချုပ်ရေးထက် ပိုဆိုးသည်က တရားလက်လွတ် ဖမ်းဆီးခြင်းပင်ဖြစ်သည်။ ညအချိန်မတော် အိမ်တံခါးခေါက် ဧည့်စာရင်းစစ်စရာရှိလို့ဟု ပြောဆိုကာ တံခါးအတင်းဖွင့်ခိုင်းသူများ ပေါ်ပေါက်လာသည်။ ရပ်ကွက်အုပ်ချုပ်ရေးမှူး အသစ်များ အလျှိုအလျှိုပေါ်လာကာ ထောက်လှန်းရေး သတင်းပေးတွေ ဖြစ်မှန်းမသိဖြစ်လာ ကြသည်။ ဧည့်စာရင်းအကြောင်းပြ၍ အိမ်ထဲအတင်းဝင်ကာ ရှိသမျှ စာရွက်စာတမ်းတွေကို မွှေနှောက်ရှာဖွေသည်။ သမဂ်္ဂတံဆိပ်ပါသော စာရွက်၊ ကြေညာချက်၊ နိုင်ငံခြားမှ ထုတ်ဝေသော နိုင်ငံရေးစာအုပ် တစ်အုပ်တလေ တွေ့လျှင်ပင် ထိုသူကို ထောက်လှန်းရေးပို့ကာ စစ်ဆေးမေးမြန်းပြီး ထောင်သွင်း အကျဉ်းချလေ့ရှိသည့် ခေတ်ဆိုးကြီးပင်ဖြစ်သည်။ တောခိုသွားသည်ဟု ယူဆခံရသော ကျောင်းသားမိဘတို့၏ အိမ်တို့ကား ဆိုဖွယ်ရာမရှိ။ လုံခြုံရေး တပ်လှန့်တိုင်း စစ်ဆေးခံကြရသည်။
စစ်ထောက်လှန်းရေး တပ်မှူးများပါဝင်သော သတင်းထုတ်ပြန်ရေးအဖွဲ့က နိုင်ငံတော် သတင်းစာရှင်းလင်းပွဲများ ပြုလုပ်ကာ ဒီမိုကရေစီရေး လှုပ်ရှားမှုများကို မြေပေါ်မြေအောက် အဖျက်သမား၏ လှုံ့ဆော်မှုကြောင့် ဖြစ်ပေါ်လာရသည်ဟု ပုံဖျက်ပြောဆို ၀ါဒဖြန့်ချိကြသည်။ သတင်းစာမှန်သမျှတွင် သမိုင်းရေစီးလှိုင်းကြီး လှေထန်ဟူသောစကားလုံးဖြင့် ဒီမိုကရေစီလှုပ်ရှားမှုများကို မင်းမဲ့စရိုက်လှုပ်ရှားမှုများ၊ ဂိုထောင်ဖောက်သူ လုယက်သူများ၊ ခေါင်းဖြတ် လူသတ်သူများအဖြစ် အဆက်မပြတ်ရေးသား ပုံဖော်ခဲ့သည်။ နိုင်ငံရေး မီးကျိုးမောင်းပျက်ဖြစ် နေသော ဗမာပြည်ကွန်မြူနစ်ပါတီ (ဗကပ)၏ စွမ်းဆောင်ရည်ကို လိုသည်ထက် ပိုမိုချဲ့ကားကာ ရှစ်လေးလုံး အရေးအခင်းကို ဗကပ၏ မြေအောက်လှုပ်ရှားမှုကြောင့် ပေါ်ပေါက်လာသယောင် ဖန်တီးသည်။ ဒို့တာဝန်အရေး ၃ ပါးကို အလုံးစုံသော ဆက်သွယ်ရေး မီဒီယာမှန်သမျှတွင် ထိပ်ဆုံးမှ ရေးသားဖော်ပြခြင်းဖြင့် ၎င်းတို့၏လုပ်ရပ်သည် တိုင်းပြည်၏ အချုပ်အခြာအာဏာကို ကာကွယ်စောင့်ရှောက်ခြင်း ဖြစ်သည်ဟု မိမိကိုယ်မိမိ ပြန်အားပေးသည်။
အချုပ်အခြာအာဏာ တည်တံ့ခိုင်မြဲရေးဟူသည်မှာ မည်ကဲ့သို့သော အခြေအနေမျိုးကို ဆိုလိုပါသနည်း။ ၂၀၁၅ နှစ်ဆန်း ဇန်န၀ါရီလအတွင်းက တရုတ်သစ်ခိုးသမား ရာကျော်ကို ကချင်ပြည်နယ်တွင် ဖမ်းဆီးမိသည်။ ရိုးရိုးပြည်တွင်း သစ်ခိုးသမားများမဟုတ်။ တရုတ်နိုင်ငံမှနေ၍ နိုင်ငံဖြတ်ကျော်ကာ လာရောက်ခိုးယူသော အဖွဲ့များဖြစ်သည်။ သစ်တင်သောကားချည်း ၄၃၆ စီး ဖမ်းမိသည်ဆိုသောကြောင့် သာမန်သူခိုးများမဟုတ်။ အဆင့်မြင့်ဂိုဏ်းဖွဲ့ ခိုးထုတ်သူများဖြစ်သည်မှာ အလွန်ထင်ရှားသည်။ အဆိုပါကားများပေါ် ချက်ချင်း သစ်လုံးတွေကောက်တင်ကာ ပြန်မောင်းထွက်သွားရ သည်မဟုတ်၊ အပင်ကြီးသစ်၊ အဖိုးတန်သစ်များကို အရင်ရွေးချယ် ရပေဦးမည်။ ပြီးတော့မှ ခုတ်လှဲရမည်။ တန်ဖိုးမပျက်စေရန် စနစ်တကျ ဖြတ်တောက်ရဦးမည်။ သေချာသည်မှာ ၎င်းသစ်ခိုးဂိုဏ်းများသည် ၂၀၁၅ ခုနှစ်တွင်မှ လာခိုးသည်မဟုတ်။ နှစ်ပေါင်းများစွာ စနစ်တကျ အဖွဲ့လိုက်ဂိုဏ်းဖြင့် ကျူးကျော်ဝင်ရောက်ကာ စိမ်ပြေနပြေ ခိုးယူနေသူများပင်ဖြစ်သည်။
၎င်းတို့ဖမ်းဆီးမိသော သတင်းကိုဖတ်ရသော သူများအားလုံး တုန်လှုပ် ချောက်ချားသွားရသည်။ တိုင်းရင်းသား လူမျိုးများနေထိုင်သော ပြည်နယ်ဖြစ်သောကြောင့် ပို၍ပင် စိုးရိမ်ထိတ်လန့်မိသည်။ တိုက်ပွဲများ မကြာခဏဖြစ်ပွားတတ်သည့် ပြည်နယ်ဖြစ်၍ နိုင်ငံတော်၏ အကာအကွယ်ကို အခြားသောပြည်မ တိုင်းဒေသကြီးများထက် ပိုမိုလိုအပ်သည်မှာ အမှန်ပင်ဖြစ်သည်။ လမ်းပန်းဆက်သွယ်ရေး ခက်ခဲသောဒေသ ဖြစ်သည်ဟု အစိုးရ၀န်ကြီးဌာနများက နှစ်ပေါင်းများစွာ ရည်ညွှန်းပြောကြားစေကာမူ လွယ်လွယ်ကူကူ ပြည်ပကျူးကျော်သူများ ရာနှင့်ချီ၍ ကားကြီးကားငယ် အသွယ်သွယ်ဖြင့် ချင်းနင်းဝင်ရောက်နေသည်မှာ ဘယ်နှနှစ်ရှိမှန်းမသိ။ မည်သို့ပင်ဆိုစေကာမူ ဤသည်ကား အချုပ်အခြာအာဏာကို ထိပါးခြင်းဖြစ်သည်။
လက်နက်ကိုင်ဝင်ရောက်တိုက်ခိုက် သိမ်းပိုက်မှ အချုပ်အခြာအာဏာကို ထိပါးသည် မဟုတ်ကြောင်း အစိုးရမင်းများ သိကြပါသည်။ သူတို့ကိုယ်တိုင် န၀တ၊ နအဖ ခေတ်များအတွင်းက အနောက်နိုင်ငံများကို ခေတ်သစ်ကို လိုနီနယ်ချဲ့များဟု အမြဲမပြတ် ၀ါဒဖြန့်ချိခဲ့ကြသူ များဖြစ်သောကြောင့် ဤသည်မှာ အချုပ်အခြာအာဏာကို ထိပါးစော်ကားခြင်းဖြစ်ကြောင်း အသေအချာ နားလည်ပါသည်။ မတော်တဆပင်ဖြစ်စေ တမင်ရည်ရွယ်ချက် စစ်ဆင်ရေးဖြင့်ဖြစ်စေ ဖမ်းဆီးပေးနိုင်ခဲ့သော တပ်မတော်မှာ တာဝန်ကျေသူများ ဖြစ်သည်။ ၎င်းင်းတို့၏ မူလတာဝန်ကြီးဖြစ်သော နိုင်ငံတော် ကာကွယ်ရေးအတွက် ထိထိရောက်ရောက် လုပ်ဆောင်ပြနိုင်ခဲ့သည်။
တာဝန်ကျေသော တပ်မတော်က ကျူးကျော်သူ တရုတ်နိုင်ငံသား သစ်သူခိုးများကို ဥပဒေတွင်းသို့အပ်နှံပြီး တရားစီရင်ရေးကဏ္ဍမှ ဆက်လက် တာဝန်ယူသွားခဲ့ရာ ပြတ်ပြတ်သားသား ပြစ်ဒဏ်များချမှတ် နိုင်ခဲ့သောကြောင့် ပြည်သူအပေါင်းက လက်ခုပ်သြဘာ ပေးခဲ့ကြသည်။ တရုတ်နိုင်ငံသည်ပင်လျှင် ၎င်းင်းနိုင်ငံသားများအပေါ် အိမ်နီးချင်း မြန်မာနိုင်ငံ တရားစီရင်ရေး၏ အမြင့်ဆုံးပြစ်ဒဏ်အပေါ် ဝေဖန်သံများ ထွက်ပေါ်ခဲ့သည်အထိ လက်သံပြောင်ခဲ့ပါ၏။ သို့သော် သြဘာသံအပေါင်းသည် တစ်ပတ်သာခံသည်။ နိုင်ငံတော်သမ်္မတ၏အထွေထွေ လွတ်ငြိမ်းချမ်းသာခွင့်တွင် တစ်သက်တစ်ကျွန်းဒဏ်ခံ ချမှတ်ခံရသော တရုတ်နိုင်ငံသား သယံဇာတသူခိုးများလည်း ပါဝင်ခဲ့သည့်အတွက် ပြည်သူများရင်နာရသည်။
ရက်များမကြာမီမှာပင် သဘာဝတရား၏ သယံဇာတဒဏ်ခတ်မှုကို မြန်မာနိုင်ငံအတွင်းရှိ နေရာပေါင်းများစွာ ခံစားရသည်။ သစ်တောများ အလွန်အကျွံ ပြုန်းတီးမှုကြောင့် မိုးရွာသွန်းမှုဒဏ်ကို ခံနိုင်စွမ်းမရှိတော့။ ယနေ့အချိန်အထိ မြန်မာနိုင်ငံ တနံတလျား ရေလွှမ်းမိုးမှု၊ ရေကြီးနစ်မြုပ်မှုဒဏ်ကို ပြည်သူသိန်းနှင့်ချီ ခံစားနေရသည်။ အစိုးရ၏ သဘာဝဘေးအန္တရာယ် ကာကွယ်ရေးအရေးပေါ် အစီအမံများလည်း အချိန်မီမဆောင်ရွက်နိုင်တော့။ ရေကြီးမှုက အလျင်အမြန်တိုးပွားလာနေသည်။ ပြည်သူအချင်းချင်း လက်ပိုက်ကြည့် မနေနိုင်တော့ပါ။ ရန်ကုန်မြို့လုံးအနှံ့ ရေဘေးကယ်ဆယ်ရေး အလှူခံတွေ ထွက်ကုန်ကြသည်။ နေ့စဉ် ရန်ကုန်မြို့နှင့် ဒေသအသီးသီးမှ အရေးပေါ်ကယ်ဆယ်ရေး ပစ္စည်းများ၊ အစားအသောက်၊ အ၀တ်အထည်နှင့် ဆေးဝါးများကို တင်ဆောင်လာသည့် ကားတန်းရှည်ကြီးများ ရေဘေးသင့်ဒေသများကို ထွက်ကာ ထောက်ပံ့ကူညီကြ ကုန်သည်။
အထိန်းအချုပ်ကင်းမဲ့စွာ အလွန်အကျွံ ခုတ်ယူခဲ့သော သစ်တောများအတွက် တန်ပြန်သက်ရောက်မှုကို လက်ရှိပြည်သူများ ခံစားနေရသည်။ မိုးခေါင်ခြင်း၊ ရေကြီးခြင်းတို့နှင့် ပတ်သက်၍ သဘာဝတရားကိုပုံချရန် တာဝန်ရှိသူအချို့က ကြိုးပမ်းနေကြသေးသည်။ တကယ်တော့ အစိုးရအဆက်ဆက် သစ်တောများနှင့် သဘာဝပတ်ဝန်းကျင်ကို ထိန်းသိမ်းစောင့်ရှောက်ရမည့် တာဝန်ရှိသည်။ သို့သော် လူကြားကောင်းရုံ မိုးရာသီ သစ်ပင်စိုက်ပျိုးပွဲ အနည်းငယ်ကို နေပြည်တော် ပျဉ်းမနားအနီးဝန်းကျင်တွင် လုပ်ပြသည်။ အခွင့်ထူးခံကုမ်္ပဏီများကတော့ သစ်တောများကို ဆက်လက်ခုတ်လှဲနေဆဲပင်။ မြန်မာ့သမိုင်းတွင် အဆိုးရွားဆုံး နိုင်ငံအနှံ့ ရေဘေးသင့်ခြင်း ကျရောက်နေလေပြီ။ အစိုးရပိုင်းက ထိရောက်တုံ့ပြန်ဆောင်ရွက်ခြင်းမရှိဟု အားလုံးကဝေဖန်ကြသည်။ နိုင်ငံတော်ကိုယ်စား ပြည်သူအပေါင်းက ငွေဖလားဖက် လမ်းမပေါ်ထွက်ကာ အလှူခံရင်း ရေဘေးသင့် နိုင်ငံသားအချင်းချင်း အသက်ဆက်လက် ရှင်သန်နိုင်ဖို့ ဆောင်ရွက်ကြရသည်အထိ ဖြစ်လာသည်။
မြန်မာနိုင်ငံ၏ သဘာဝသစ်တောများကို ပြည်တွင်းစစ် အကြောင်းပြကာ ပြည်တွင်း သစ်မှောင်ခိုသမားများ ခိုးထုတ်နေကြသည်မှာ နှစ်ပေါင်းများစွာ ကြာခဲ့ပြီဖြစ်သည်။ မြန်မာ့သစ်တောများတွင် အဖိုးတန်သစ်ပင်များရှိသည်။ အင်္ဂလိပ်တို့ မြန်မာနိုင်ငံကို သိမ်းပိုက်ရာတွင် မြန်မာ့သစ်တောများသည် အကြောင်းပြချက် တစ်ရပ်ဖြစ်သည်။ သင်္ဘောတည်ဆောက်ရာတွင် အသုံးပြုနိုင်သည့် အကောင်းဆုံးသစ်များမှာ မြန်မာ့သစ်တောများတွင် သဘာဝအလျောက် ပေါက်နေသည်။ အင်္ဂလိပ် မြန်မာ စစ်ပွဲ ၃ ကြိမ်ဖြစ်ပွားခဲ့ရာတွင် နောက်ဆုံး ပြည်သိမ်းတိုက်ပွဲဖြစ်သည့် တတိယစစ်ပွဲ၏အကြောင်းရင်းသည် မြန်မာဘုရင်ပိုင် သစ်တောအတွင်း၌ လိုင်စင်ဖြင့် ထုတ်ယူခွင့်ရထားသည့် ဘုံဘေဘားမား သစ်ကုမ်္ပဏီက လိုသည်ထက်ပို၍အမြောက်အမြား ခိုးထုတ်ခဲ့သဖြင့် မြန်မာဘုရင်က ဒဏ်ရိုက်သည်ကို မကျေနပ်သော ကုန်သည်ကြီးများက အင်္ဂလိပ်အစိုးရကို ၀ိုင်းဝန်းထောက်ပံ့ကာ အထက်မြန်မာပြည်ကို သိမ်းယူဖို့ ကိုယ်ထိလက်ရောက် အားပေးခဲ့ခြင်းဖြစ်သည်။ မြန်မာ့သမိုင်းတွင် တိုင်းတစ်ပါးသားတို့ သစ်ခိုးထုတ်သောကြောင့် ရှင်ဘုရင်ပါဖမ်းဆီးခံရကာ တစ်နိုင်ငံလုံး ကျွန်ဘ၀ ရောက်ရသည်အထိ ဖြစ်ခဲ့ရသည်။
မြန်မာနိုင်ငံ၏သစ်တောများကို ကာကွယ်စောင့်ရှောက်ရန် ကြိုးပမ်းအားထုတ်ခဲ့သော သီပေါဘုရင်သည် မြန်မာနိုင်ငံ၏ နောက်ဆုံးဘုရင်အဖြစ် မှတ်တမ်းဝင်သွားခဲ့ရသည်။ သစ်ခိုးသည်ကို အကြောင်းပြု၍ မြန်မာဘုရင်၏ အချုပ်အခြာအာဏာကို ထိပါးလာခဲ့ခြင်း ဖြစ်သည်။ သီပေါဘုရင်လက်ထက်တွင် ခေတ်မီ လက်နက် ကိုင်ဆောင်နိုင်သည့် အမြဲတမ်းတပ်မတော် အနည်းငယ်သာရှိသော်လည်း အချုပ်အခြာအာဏာနှင့် ပတ်သက်၍ အထိအခိုက်မခံဘဲ ခုခံစစ်ပွဲ ဆင်နွှဲခဲ့ပါသေးသည်။ အားမတန်မာန်လျှော့ကာ လက်နက်ချ အညံ့ခံခဲ့သော်လည်း သီပေါဘုရင်ကိုယ်တိုင် အင်္ဂလိပ်အကျဉ်းသားအဖြစ် သေသည်အထိ ခံယူသွားခဲ့သည်ကို တွေ့ရသည်။
၁၉၈၈ ခုနှစ်၊ စက်တင်ဘာ ၁၈ ရက်နေ့မှ စတင်ကာအာဏာယူခဲ့သည့် စစ်အစိုးရသည် ဒို့တာဝန်အရေး ၃ ပါးကို ဆောင်ပုဒ်လုပ် အုပ်ချုပ်ခဲ့သည်။ မြန်မာ့တပ်မတော်ကိုလည်း ခေတ်မီတပ်မတော် ဖြစ်အောင် ပြန်လည်ထူထောင်ခဲ့သည်။ နယကအမည်ပြောင်းသော စစ်အစိုးရကိုယ်တိုင် ဒို့တာဝန်အရေး ၃ ပါးကို အခြေခံမူအဖြစ် သတ်မှတ်ကာ ၂၀၀၈ ခုနှစ် ဖွဲ့စည်းပုံ အခြေခံဥပဒေကို ရေးဆွဲခဲ့သည်။ အဆိုပါ အခြေခံဥပဒေအတိုင်း ရွေးကောက်ပွဲကျင်းပကာ ၂၀၁၀ ခုနှစ်မှစ၍ လက်ရှိအစိုးရ ဖြစ်ပေါ်လာခဲ့သည်။ အစိုးရသက်တမ်း ကုန်ခါနီး နောက်ဆုံးနှစ်တွင် အချုပ်အခြာအာဏာကို ထိခိုက်စော် ကားလာသည့် တိုင်းတစ်ပါးသားများ ကျူးကျော်ဝင်ရောက်ကာ သမိုင်းဝင်သစ်ခိုးပွဲကြီး ကျင်းပနေသည်ကို ဖမ်းဆီးရမိခဲ့သည်။ တရားစီရင်ရေး အဖွဲ့ကလည်း တိုင်းတစ်ပါးသား သမိုင်းဝင်သစ် ခိုးသမားများကို အမြင့်ဆုံးပြစ်ဒဏ် ချမှတ်ပေးခဲ့သည်။ သို့သော် အစိုးရအဖွဲ့က နိုင်ငံတော် လွတ်ငြိမ်းချမ်းသာခွင့်ဖြင့် တစ်သက်တစ်ကျွန်းဒဏ်ခံ တိုင်းတစ်ပါးသား သဘာဝသယံဇာတ ခိုးထုတ်သူများကို ခြွင်းချက်မရှိ လွှတ်ပေးလိုက်သောကြောင့် အဆင့်ဆင့် အရေးယူ ဆောင်ရွက်ခဲ့မှုများအားလုံး သဲထဲရေသွန်သလို ဖြစ်သွားရသည်။ အစိုးရအဖွဲ့အနေဖြင့် မည်သည့် အကြောင်းပြချက်ဖြင့် လွတ်ငြိမ်းချမ်းသာခွင့်တွင် တစ်သက်တစ်ကျွန်းကျခံနေရသည့် နိုင်ငံခြားသားများ ထည့်သွင်း လွှတ်ပေးခဲ့ကြောင်း တရားဝင်ပြောဆိုခြင်းမရှိခဲ့။ နိုင်ငံရေးအရ၊ သံတမန်ရေးအရ လွှတ်ပေးသယောင် ရိပ်ဖမ်းသံဖမ်း ပြောဆိုသူအရာရှိကြီး အနည်းငယ်သာ ရှိသည်။
သို့သော် သဘာဝတရားကတော့ တရားဝင်သည်ဖြစ်စေ မ၀င်သည်ဖြစ်စေ ၎င်း၏သဘောထားကို ရေလွှမ်းမိုးမှုဖြင့် ပြသလိုက်ပါပြီ။ နိုင်ငံတော်၏ အချုပ်အခြာအာဏာကို ထိပါးလာသည့် မည်သည့်ကိစ်္စရပ်ကိုမဆို တားဆီးကာကွယ် စောင့်ရှောက်ရမည့် တာဝန်သည် အားလုံး၏ တာဝန်သာဖြစ်သည်။ နိုင်ငံတော်၏ အသည်းနှလုံး သစ်တောများ ပြုတ်ပြုတ်ပြုန်းနေသည်ကို တာဝန်ကျေ ဖမ်းဆီး၊ အမြင့်ဆုံး ပြစ်ဒဏ်ချမှတ်၊ မသိမသာ ပြန်လွှတ်ခြင်းသည် နိုင်ငံတော်ကို ကာကွယ်စောင့်ရှောက်ခြင်းမည် ပါ၏လောဟု ပြန်လည်သုံးသပ်ရန် လိုအပ်ပါသည်။ နိုင်ငံခြားသားတို့ နိုင်ငံအတွင်းကျူးကျော်ကာ နိုင်ငံတော်၏ အသည်းနှလုံးဖြစ်သည့် ရာသီဥတုကိုထိန်းညှိရာ သစ်တောများကို စည်းကမ်းမဲ့ စက်ယန်္တရားကြီးများဖြင့် လူအင်အားရာချီ၍ လာရောက်ထုတ်ယူခဲ့ခြင်းသည် နိုင်ငံတော်၏ အချုပ်အခြာအာဏာကို ထိပါးစော် ကားခြင်းသာဖြစ်ကြောင်း ဆက်စပ်တွေးတောမိသည်ကို ရေးသားလိုက်ရပါသည်။ သဘာဝ၏ အချက်ပေးသံကို မှန်မှန်ကန်ကန် တုံ့ပြန်နိုင်ကြပါစေ။

လှမျိုးထွန်း
The Ladies News Journal ပါ ဆောင်းပါး